ჩხოროწყუში ყველაზე დიდი ელარჯი მომზადდება სახელმწიფო დაცვის სპეციალური სამსახურის თანამშრომელმა მეორე რეკორდი დაამყარა სახელმწიფო დაცვის სპეციალური სამსახურის თანამშრომელმა მსოფლიო რეკორდი დაამყარა მხატვარმა ვახტანგ აბაშიძემ მორიგი რეკორდი ზეპირ მათემატიკურ გამოთვლაში დაამყარა იოსებ ხუციშვილმა მორიგი რეკორდი დაამყარა

22 December 2013

იოსებ ხუციშვილმა ბრიტანელი პედი დოილის რეკორდი მოხსნა

20 დეკემბერს შინაგან საქმეთა სამინისტროს თანამშრომელმა იოსებ ხუციშვილმა მორიგი მსოფლიო რეკორდი დაამყარა! მან ცალ ხელზე, 21–კილოგრამიანი ტვირთით 46 აზიდვა შეასრულა და მრავალგზის გინესის რეკორდსმენისბრიტანელი პედი დოილის მიღწევა გააუმჯობესა.

ღონისძიება შინაგან საქმეთა სამინისტროს მხარდაჭერით, საპატრულო პოლიციის დეპარტამენტის სპორტკომპლექსში ჩატარდა. რეკორდის მიზანი ერთი წუთის განმავლობაში 18–კილოგრამიანი ტვირთით 31–ზე მეტი აზიდვის შესრულება იყო, თუმცა ხუციშვილმა 21–კილოგრამიანი ზურგჩანთით,  45 წამში 46 აზიდვა შეასრულა და დოილის მიღწევა დამაჯერებელი სხვაობით გააუმჯობესა.

რეკორდის დამყარების პროცესს საქართველოს რეკორდების ფედერაციის წარმომადგენლები დაესწრნენ, ხუციშვილის მიღწევა ადგილზე დააფიქსირეს და მსოფლიო რეკორდსმენის დამადასტურებელი კიდევ ერთი სერტიფიკატი გადასცეს (იოსებ ხუციშვილის წინა სარეკორდო ღონისძიებებიც საქართველოს რეკორდების ფედერაციის ორგანიზებით ჩატარდა და საერთაშორისო მასშტაბის აღიარებებიც მოიპოვა).

რეკორდის დამყარების პროცესს ესწრებოდნენ და აქტიურად გულშემატკივრობდნენ შინაგან საქმეთა სამინისტროს თანამშრომლები. გარდა ამისა, რეკორდის დამყარების პროცესი ფედერაციის ინტერნეტ–ტელევიზიის, GRF TV – ის მეშვეობით პირდაპირ ეთერში გადაიცემოდა და მისი ყურება მსოფლიოს ნებისმიერი წერტილიდან, საქართველოს რეკორდების ფედერაციის ვებ–გვერდის საშუალებით იყო შესაძლებელი.

„დღევანდელი რეკორდის დასამყარებლად ორი თვის განმავლობაში ვემზადებოდი. ამით ჩემი სპორტული კარიერა არ დამიმთავრებია, სამომავლოდ ვაპირებ სხვა რეკორდების დამყარებას და თავისუფალი სტილით ჭიდაობაშიც გავაგრძელებ ასპარეზობას“ – აღნიშნა ხუციშვილმა.

ფედერაციის პრეზიდენტის, დავით ბეგიაშვილის განცხადებით, ხუციშვილმა დოილის შედეგს ორივე რიცხობრივი კრიტერიუმით (დროით და აზიდვების რაოდენობით) გადააჭარბა. „მიღებულ შედეგებს უახლოეს მომავალში გადავუგზავნით გინესის მსოფლიო რეკორდებსა და სხვა საერთაშორისო ორგანიზაციებს“ – განაცხადა მან.

34 წლის იოსებ ხუციშვილი საპატრულო პოლიციის დეპარტამენტის სპორტული ჯგუფის ხელმძღვანელია. წარსულში მას 10 მსოფლიო რეკორდი აქვს დამყარებული. გარდა ამისა, მიმდინარე წლის 7 აგვისტოს, ირლანდიაში გამართულ „პოლიციისა და სახანძრო სამსახურის მსოფლიო ოლიმპიადაზე“, თავისუფალი სტილით ჭიდაობაში, 75 კგ. წონით კატეგორიაში იასპარეზა და ჩემპიონობა მოიპოვა.

იხილეთ ღონისძიების ფოტო და ვიდეომასალა:

18 December 2013

პოლიციის კაპიტანი იოსებ ხუციშვილი გინესის რეკორდის მოხსნას შეეცდება

20 დეკემბერს, 13:00 სთ–ზე, პოლიციის კაპიტანი და ათგზის მსოფლიო რეკორდსმენი იოსებ ხუციშვილი მორიგი რეკორდის დამყარებას შეეცდება. ღონისძიების მხარდამჭერია შინაგან საქმეთა სამინისტრო.

ხუციშვილის მიზანია, ერთი წუთის განმავლობაში, ცალ ხელზე 18–კილოგრამიანი ტვირთით წოლბჯენში აზიდვების მაქსიმალური რაოდენობის შესრულება. გინესის მსოფლიო რეკორდების ვერსიით, მიმდინარე რეკორდი 31 აზიდვაა და ბრიტანელ პედი დოილს ეკუთვნის.

ასპარეზობა შსს საპატრულო პოლიციის დეპარტამენტის სპორტკომპლექსში (კახეთის გზატკეცილი, 38–ე კილომეტრი), ჩატარდება. რეკორდის დამყარების პროცესს დაესწრებიან და ადგილზე დააფიქსირებენ საქართველოს რეკორდების ფედერაციის წარმომადგენლები.

ღონისძიება ფედერაციის ინტერნეტ–მაუწყებლობის GRF TV–ის საშუალებით პირდაპირ ეთერში გადაიცემა და მისი ყურება ფედერაციის ვებ–გვერდზე იქნება შესაძლებელი.

34 წლის იოსებ ხუციშვილს დღემდე 10 მსოფლიო რეკორდი აქვს დამყარებული. გარდა ამისა, წარმატებით ასპარეზობს თავისუფალ ჭიდაობაშიც – მიმდინარე წლის 7 აგვისტოს ბელფასტში, "პოლიციისა და სახანძრო სამსახურის მსოფლიო ოლიმპიადის" ფინალში, 75 კგ წონითი კატეგორიაში, პერუელი მოწინააღმდეგე დაამარცხა და ოქროს მედალი მოიპოვა.

15 December 2013

ლიტველმა ძალოსანმა გინესის რეკორდი დაამყარა

3 დეკემბერს, ქალაქ დრუსკინინკაიში ლიტველმა ძალოსანმა – ჟიდრუნას სავიჩკასმა ერთმანეთზე გადაბმული 12 ავტომობილი მხრებით გაწია და გინესის რეკორდი დაამყარა. ღონისძიება ავტომწარმოებელი კომპანია "ნისანის" მხარდაჭერით ჩატარდა.

სავიჩკასი ყველა დროის ერთ–ერთ საუკეთესო ძალოსნად მიიჩნევა. მას 5–ჯერ აქვს მოპოვებული ჩემპიონის ტიტული "მსოფლიოს უძლიერეს მამაკაცთა" ჩემპიონატზე.

სარეკორდო მიღწევის შესასრულებლად ლიტველ სპორტსმენს მხოლოდ ერთი ცდა დასჭირდა. მან 5 მეტრ დისტანციაზე გადააადგილა ერთმანეთზე გადაბმული "ნისან ნოუტის" 12 ჰეჩბექი (საერთო წონით 12.941 კილოგრამი). ღონისძიებას გინესის მსოფლიო რეკორდების მსაჯი ჯეკ ბროუკბენკი ესწრებოდა. მან ადგილზე დაადასტურა რეკორდის დამყარება და ძალოსანს ოფიციალური სერტიფიკატი გადასცა.

"რეკორდის დამყარება უდიდესი შეგრძნებაა. მხარდაჭერისთვის დიდ მადლობას ვუხდი "ნისანს", რომელმაც ჩემი შესაძლებლობების გამოვლენის საშუალება მომცა" – განაცხადა სავიჩკასმა.

"ჩვენ ყოველთვის უმაღლესი მიზნები გვაქვს და მოგვწონს რეკორდების დამყარება. მოხარულები ვართ, რომ დავეხმარეთ ჟიდრუნასს და ღონისძიებაზე ვიხილეთ მისი ძალიან ბევრი გულშემატკივარი" – აღნიშნა ტაინა ერკილამ – ევროპასა და სკანდინავიის ქვეყნებში "ნისანის" წარმომადგენლობის საზოგადოებასთან ურთიერთობის სამსახურის დირექტორმა.

"ნისანის" სახელი წელს უკვე მეორედ მოხვდა რეკორდების წიგნში – მანამდე, 22 აგვისტოს, კომპანიის მიერ წარმოებულმა "ნისან–პატრულის" მარკის ავტომობილმა დაამყარა გინესის რეკორდი, როდესაც 170–ტონიანი თვითმფრინავის გაწევა მოახერხა.



06 December 2013

არტაშეს ელბაქიანის რეკორდს Street Workout-ის მსოფლიო ფედერაცია ეხმაურება

ახალციხელი სპორტსმენის – არტაშეს ელბაქიანის რეკორდის შესახებ ინფორმაციას საქართველოს რეკორდების ფედერაციაზე დაყრდნობით Street Workout-ის მსოფლიო ფედერაცია (WSWCF) აქვეყნებს.

გთავაზობთ სტატიის თარგმანს, რომელიც 5 დეკემბერს Street Workout-ის მსოფლიო ფედერაციის Facebook-ის გვერდზე გამოქვეყნდა.

"საინტერესო მოვლენა მოხდა ტანვარჯიშის სფეროში, WSWCF–ის წევრ ქვეყანა საქართველოში.
ქართველმა არტაშეს ელბაქიანმა ტანვარჯიშში მსოფლიო რეკორდი დაამყარა
საქართველოში ტანვარჯიშის მსოფლიო რეკორდი დამყარდა. 25 წლის არტაშეს ელბაქიანმა ჰორიზონტალურ ძელზე შეჩერებლად 401 ბრუნი შეასრულა. რეკორდის დამყარების პროცესს დაესწრნენ და წარმატება ადგილზე დააფიქსირეს საქართველოს რეკორდების ფედერაციის (რეკორდული მიღწევების სფეროს ხელმძღვანელი ორგანო საქართველოში) მსაჯებმა. 
ღონისძიება 1 დეკემბერს, საქართველოს ერთ–ერთ ულამაზეს ისტორიულ ძეგლზე – რაბათის ციხეზე (ახალციხის მუნიციპალიტეტში) ჩატარდა.
სარეკორდო ასპარეზობას 200–ზე მეტი გულშემატკივარი დაესწრო (მათ შორის იყვნენ ახალციხის მუნიციპალიტეტის საკრებულოს თავმჯდომარე ოლეგ სანდროშვილი და ადგილობრივი ხელისუფლების სხვა წარმომადგენლები). 
ციხის ეზოს ცენტრში გამართულ სცენაზე სტანდარტული ჰორიზონტალური ძელი დამონტაჟდა. უსაფრთხოების ზომების დაცვით, ღონისძიების მიმდინარეობას ესწრებოდა ადგილობრივი ექიმი. 
არტაშეს ელბაქიანს დაახლოებით 300 ბრუნის შესრულება ჰქონდა დაგეგმილი, თუმცა ამ ნიშნულის მიღწევის შემდეგაც არ შეჩერებულა. საერთო ჯამში, მან შეუჩერებლად 401 აზიდვა შეასრულა, რასაც დაახლოებით 13 წუთი დასჭირდა. ელბაქიანი ოფიციალურად გახდა მსოფლიო რეკორდის მფლობელი ჰორიზონტალურ ძელზე შეუჩერებლად ბრუნვაში. 
"ძალიან ბედნიერი ვარ, რეკორდსმენობა საუკეთესო შეგრძნებაა! უახლოეს მომავალში ჩემი მსოფლიო რეკორდის გაუმჯობესებას ვაპირებ" – განუცხადა არტაშესმა საქართველოს რეკორდების ფედერაციის რეპორტიორებს. 
საქართველოს რეკორდების ფედერაციისგან ელბაქიანს მსოფლიო რეკორდის დამადასტურებელი სერტიფიკატი და მედალი გადაეცა. გარდა ამისა, ყველა საჭირო მასალა საერთაშორისო სარეკორდო ორგანიზაციებს გაეგზავნება, მათ წიგნებსა და ვებ–გვერდებზე გამოსაქვეყნებლად."
ახალციხელი სპორტსმენის მიღწევის შესახებ საკუთარი მოსაზრება Street Workout-ის მსოფლიო ფედერაციის პრეზიდენტმა – მარის სლეზინსმაც დააფიქსირა.

"მსგავსი ტიპის რეკორდები ოლიმპიადასა და სხვა გრანდიოზულ შეჯიბრებზე გამარჯვების შესანიშნავი ალტერნატივაა. იმედი მაქვს, არტაშეს ელბაქიანის რეკორდი გახდება შთაგონების წყარო სხვებისთვის, რომ თითოეულ ჩვენგანს შეუძლია გახდეს საუკეთესო რაიმე სფეროში" – განაცხადა სლეზინსმა.

04 December 2013

ახალციხელმა არტაშეს ელბაქიანმა მსოფლიო რეკორდი დაამყარა

1 დეკემბერს, რაბათის ციხეზე გამართულ სარეკორდო ასპარეზობაზე ახალციხელმა სპორტსმენმა არტაშეს ელბაქიანმა მსოფლიო რეკორდი დაამყარა. მან ტურნიკზე (ჰორიზონტალურ ძელზე) წინ მიმართულებით 401 ბრუნი შეასრულა და წინა რეკორდი 249 ერთეულით გააუმჯობესა. ღონისძიება ახალციხის მუნიციპალიტეტის საკრებულოსა და გამგეობის მხარდაჭერით ჩატარდა.

ასპარეზობა 15:00 სთ-ზე იყო დაგეგმილი, თუმცა ტექნიკური ხარვეზების გამო ერთი საათის დაგვიანებით დაიწყო. თანაქალაქელი სპორტსმენის საგულშემატკივროდ რაბათის ციხის ეზოში 200-მდე ადგილობრივი მცხოვრები იყო შეკრებილი. მათ შორის იყვნენ ახალციხის მუნიციპალიტეტის საკრებულოს თავმჯდომარე ოლეგ სანდროშვილი, გამგებლის მოადგილე აშოტ მანასიანი, ფრაქცია "ქართული ოცნება – ახალციხის" თავმჯდომარე ნუგზარ თამარაშვილი და ადგილობრივი ხელისუფლების სხვა წარმომადგენლები.

ღონისძიება ადგილობრივი ფოლკლორული ანსამბლის სიმღერით გაიხსნა. შემდეგ კი დამსწრე საზოგადოების ტაშისა და შეძახილების ფონზე სცენაზე არტაშეს ელბაქიანი გამოვიდა და სპეციალურად მისთვის მოწყობილ ტურნიკზე სარეკორდო ასპარეზობა დაიწყო.

რეკორდის დამყარების პროცესი საქართველოს რეკორდების ფედერაციის ინტერნეტ–მაუწყებლობის – GRF TV–ის მეშვეობით პირდაპირ ეთერში გადაიცემოდა. 

ახალციხელი სპორტსმენის მოძრაობებს საქართველოს რეკორდების ფედერაციის მსაჯები აფიქსირებდნენ და მის მიერ ნაჩვენებ შედეგს პერიოდულად აცხადებდნენ. სარეკორდო ნიშნულის გადაბიჯებამ გულშემატკივრებში განსაკუთრებული ემოცია გამოიწვია, საბოლოოდ დაფიქსირებულმა რეზულტატმა კი ყოველგვარ მოლოდინს გადააჭარბა – არტაშეს ელბაქიანმა ტურნიკზე შეუჩერებლად 401 ბრუნი შეასრულა და ამ მაჩვენებლით 249 ერთეულით გააუმჯობესა წინა რეკორდი – 152 ბრუნი, რომელიც სომხეთის მოქალაქე რომან შარადიანს ეკუთვნოდა.

"არტაშეს ელბაქიანმა საუკეთესო შედეგი აჩვენა, მიმდინარე მსოფლიო რეკორდის ასეთი სხვაობით გაუმჯობესება იშვიათი შემთხვევაა. აღსანიშნავია ის ფაქტიც, რომ ელბაქიანის შესრულების სტილი ამ კატეგორიის რეკორდებს შორის ყველაზე სრულყოფილია" – განაცხადა საქართველოს რეკორდების ფედერაციის პრეზიდენტმა დავით ბეგიაშვილმა.

წარმატებული ასპარეზობის შემდეგ სპორტსმენი ახალციხის მუნიციპალიტეტის საკრებულოს თავმჯდომარე ოლეგ სანდროშვილმა დააჯილდოვა.

საქართველოს რეკორდების ფედერაცია არტაშეს ელბაქიანის რეკორდის მასალებს უახლოეს მომავალში საერთაშორისო ორგანიზაციებს გადაუგზავნის მათ გამოცემებში შესატანად.

იხილეთ ღონისძიების ფოტოგალერეა და ვიდეო:



ამ თემაზე:

რაბათის ციხეზე მსოფლიო რეკორდი დამყარდება