ჩხოროწყუში ყველაზე დიდი ელარჯი მომზადდება სახელმწიფო დაცვის სპეციალური სამსახურის თანამშრომელმა მეორე რეკორდი დაამყარა სახელმწიფო დაცვის სპეციალური სამსახურის თანამშრომელმა მსოფლიო რეკორდი დაამყარა მხატვარმა ვახტანგ აბაშიძემ მორიგი რეკორდი ზეპირ მათემატიკურ გამოთვლაში დაამყარა იოსებ ხუციშვილმა მორიგი რეკორდი დაამყარა

24 January 2014

პირველად საქართველოში – პირდაპირ ეთერში მსოფლიო რეკორდი დამყარდა!

23 იანვარს საქართველოს სატელევიზიო სივრცეში უპრეცედენტო ფაქტი დაფიქსირდა – ქართველმა სპორტსმენმა გიორგი როსტომაშვილმა მსოფლიო რეკორდი პირდაპირ ეთერში დაამყარა. რეკორდის დამყარების პროცესი "რუსთავი 2"–ის გადაცემა "დილა მშვიდობისა, საქართველო!"–ს ეთერში გადაიცემოდა.

პირდაპირი ჩართვა რეკორდსმენი გურამ უსტიაშვილის მიერ კბილებით მსუბუქი ავტომობილის (BMW 525) საჩვენებელი გაწევით დაიწყო. საეთერო დროის ძირითადი ნაწილი საქართველოს რეკორდების ფედერაციის წევრებსა და მათი წარმატებების პრეზენტაციას დაეთმო. ფედერაციის პრეზიდენტმა დავით ბეგიაშვილმა ქართველი რეკორდსმენების შედეგებსა და სამომავლო გეგმებზე ისაუბრა, შემდეგ კი ახალი პრეტენდენტები – გურამ ლომსაძე და გიორგი როსტომაშვილი წარადგინა.


გურამ ლომსაძე შსს საპატრულო პოლიციის დეპარტამენტის თანამშრომელია. მას 23 037 ასანთის ღერით ამავე დეპარტამენტის გერბის გამოსახულება აქვს შედგენილი, სამომავლოდ კი გინესის რეკორდების წიგნში შესვლას მსოფლიოში ყველაზე დიდი ფართობის მოზაიკის შექმნით აპირებს. საქართველოს რეკორდების ფედერაციას გინესისგან უკვე მიღებული აქვს შესაბამისი წესები და რეკომენდაციები გურამის სამომავლო რეკორდისთვის.


რეკორდსმენობის კიდევ ერთი პრეტენდენტს – 25 წლის ყოფილი მკლავჭიდელსა და საქართველოს პრიზიორს – გიორგი როსტომაშვილს ცალი ხელით, ერთი წუთის განმავლობაში, 25–კილოგრამიანი ტვირთის (ე.წ. შტანგის ფილა) აგდება–დაჭერით 24–ზე მეტი ნახევარწრიული ბრუნი (ეწ "ფლიპინგი") უნდა შეესრულებინა. მან 5 ერთეულით გადააჭარბა წინა სარეკორდო მაჩვენებელს, რომელიც შვედ ჯონი ლილეშტრომს ეკუთვნოდა და წარმატებით დაამყარა ახალი მსოფლიო რეკორდი.


რეკორდის დამყარების პროცესს საერთაშორისო მოთხოვნების თანახმად, საქართველოს რეკორდების ფედერაციის მსაჯები დაესწრნენ და ადგილზე დაადასტურეს როსტომაშვილის წარმატება. ასპარეზობის მასალები უახლოეს მომავალში გინესის მსოფლიო რეკორდების რედაქციას გადაეგზავნება.


ამ თემაზე:
„რუსთავი 2“–ის პირდაპირ ეთერში მსოფლიო რეკორდი დამყარდება!

22 January 2014

„რუსთავი 2“–ის პირდაპირ ეთერში მსოფლიო რეკორდი დამყარდება!

ხუთშაბათს – 23 იანვარს, „რუსთავი 2“–ის დილის გადაცემა საქართველოს რეკორდების ფედერაციას უმასპინძლებს. პირდაპირი ჩართვა „დილა მშვიდობისა, საქართველო!“–ს ეთერში, 09:25 სთ–ზე დაიწყება. ფედერაციის წარმომადგენლები ისაუბრებენ მიღწეულ წარმატებებსა და სამომავლო გეგმებზე, მსოფლიო რეკორდსმენი გურამ უსტიაშვილი კი კბილებით მსუბუქი ავტომობილის საჩვენებელ გაწევას შეასრულებს.

მოქმედი რეკორდსმენების მიღწევების გარდა, ფედერაცია წარმოადგენს ახალ პრეტენდენტებსაც – შსს საპატრულო პოლიციის თანამშრომელ გურამ ლომსაძეს, თავის რეკორდული მონაცემების ნაკეთობასთან – ასანთის ღერებით შექმნილ უნიკალურ მოზაიკასთან ერთად, და ძალოსან გიორგი როსტომაშვილს, რომელიც პირველად გამოვა სარეკორდო ასპარეზობაზე და გინესის რეკორდის მოხსნას შეეცდება.

როსტომაშვილის მიზანია, ერთი წუთის განმავლობაში, ცალი ხელით, შტანგის 25–კილოგრამიანი ფილის აგდება–დაჭერით ნახევარწრიული ბრუნის (ე.წ. "ფლიპინგი") მაქსიმალური რაოდენობის შესრულება. ამ კატეგორიაში მოქმედი რეკორდსმენი შვედი ჯონი ლინდშტრომია, რომელმაც 2001 წელს, სტოკჰოლმში გამართულ გინესის მსოფლიო რეკორდების შოუში 24 ბრუნი შეასრულა და მას შემდეგ ეს რეკორდი არავის მოუხსნია. ლინდშტრომის მიღწევის გასაუმჯობესებლად, როსტომაშვილს ერთი წუთის განმავლობაში მინიმუმ 25 ბრუნის შესრულება მოუწევს.

გიორგი როსტომაშვილის მიღწევას საქართველოს რეკორდების ფედერაციის მსაჯები ადგილზე დააფიქსირებენ. აღსანიშნავია, რომ ეს სარეკორდო ასპარეზობა თავის მხრივ უნიკალური მოვლენა იქნება ქართულ სატელევიზიო სივრცეში, რადგან ოფიციალური მსოფლიო რეკორდის დამყარების პროცესი საქართველოს ისტორიაში პირველად, პირდაპირ ეთერში გადაიცემა.

16 January 2014

გინესმა დუბაის ფეიერვერკის რეკორდი ოფიციალურად დაადასტურა

13 იანვარს, გინესის მსოფლიო რეკორდების რედაქციამ დუბაის საახალწლო ფეიერვერკის ზუსტი რიცხობრივი მონაცემები გამოაქვეყნა და ოფიციალურად დაადასტურა მსოფლიო რეკორდის დამყარება.

ორკვირიანი მუშაობის შედეგად გინესის მსაჯებმა გამოთვალეს, რომ დუბაიში გამართულ საახალწლო ღონისძიებაზე, 6–წუთიანი ფეიერვერკის განმავლობაში 479,651 მაშხალა გაისროლეს (შესაბამისად, წუთში დაახლოებით 80 000, წამში კი 1 332 მაშხალა).

როგორც გაირკვა, დუბაის ფეიერვერკმა პირველივე წუთის დასრულებისთანავე გადააჭარბა სარეკორდო ზღვარს და გააუმჯობესა მანამდე არსებული, 77 282–მაშხალიანი ფეიერვერკის რეკორდი, რომელიც 2011 წლის ნოემბერში, კუვეიტში იყო დამყარებული.

„ეს არის საკულტო რეკორდი, რომელმაც დუბაიში ფენომენალურ მასშტაბებს მიაღწია. მოხარული ვარ დავადასტურო, რომ დუბაიმ მოხსნა გინესის ახალი რეკორდი მსოფლიოს უდიდესი ფეიერვერკის წარმოდგენით“ – აღნიშნა გინესის მსოფლიო რეკორდების მსაჯმა ტალალ ომარმა რეკორდის შეფასებისას.

გინესის მსოფლიო რეკორდების ინფორმაციით, გრანდიოზული ფეიერვერკის პროექტის შემუშავებას 10–თვიანი მოსამზადებელი პერიოდი და 5 000–ზე მეტი ადამიანის ძალისხმევა დასჭირდა. ამ ღონისძიებით დუბაისთვის საკმაოდ მნიშვნელოვანი წლის დაგვირგვინება აღნიშნეს (გასულ წელს დუბაი World Expo 2020 ნომინანტი გახდა), აგრეთვე არაბეთის გაერთიანებული საემიროების 42–ე ეროვნული დღესასწაული იზეიმეს.



მასალა მომზადებულია გინესის მსოფლიო რეკორდების მიხედვით

13 January 2014

ბრიტანელმა სერფერმა მსოფლიოს უდიდესი ტალღა დაძლია

34 წლის ენდრიუ კოტონმა სერფინგის დაფით 80–ფუტიანი (24.3 მეტრი) ტალღის გადალახვა მოახერხა და ახლა გინესის მსოფლიო რეკორდებისგან საკუთარი მიღწევის ოფიციალურ დადასტურებას ელოდება.

სარეკორდო ტრიუკი გასული წლის ოქტომბერში, პრაია დე ნორტეს სანაპიროზე (პორტუგალია) გაიმართა. მას შემდეგ, რაც ქარიშხალ „სენ ჯიუდის“ მოახლოების შესახებ ინფორმაცია გავრცელდა, პორტუგალიაში შეკრებილ პროფესიონალ სერფერებს ენდრიუც შეუერთდა თავისი შესაძლებლობების გამოსავლენად.


წყალში შესვლამდე კოტონმა განაცხადა, რომ მისი ეს გადაწყვეტილება მხოლოდ რეკორდსმენობის სურვილით არ იყო განპირობებული: „ უბრალოდ მიყვარს წყალში ყოფნა და ვოცნებობ, გავხდე პროფესიონალი სერფერი. იმედი მაქვს, უფრო და უფრო დიდი ტალღების დაძლევასთან ერთად ჩემს მიზანს აუცილებლად მივაღწევ!“


ატლანტის ოკეანის აღელვებულ ტალღებში ენდრიუ მისმა უახლოესმა მეგობარმა – ჯარეტ მაკ’ნამარამ შეიყვანა. გინესის მსოფლიო რეკორდების მიხედვით, მიმდინარე მსოფლიო რეკორდი სერფინგის დაფით უდიდესი ტალღის გადალახვაში მაკ’ნამარას ეკუთვნის (მან 23.77–მეტრიანი ტალღის დაძლევა მოახერხა). აღსანიშნავია ის ფაქტი, რომ 2011 წლის 1 ნოემბერს, ამავე სანაპიროზე, ჯარეტ მაკ’ნამარას გინესის რეკორდის დამყარების პროცესში სწორედ ენდრიუ უწევდა ასისტენტობას.


„მიხარია, რომ შეიძლება მსოფლიო რეკორდსმენი გავხდე, არანაკლებ სასიამოვნოა იმის გახსენება, რომ 2 წლის წინ მე მივეხმარე ჯარეტს რეკორდსმენის ტიტულის მოპოვებაში, და ყველაზე შთამბეჭდავია ის ფაქტი, რომ ახლა უკვე თვით ჯარეტი დამეხმარა  მიზნის მიღწევაში“ – განაცხადა ენდრიუმ.


ბრიტანელი სერფერის მიღწევის დამადასტურებელი დოკუმენტები განსახილველად გინესის მსოფლიო რეკორდებს გაეგზავნა. საბოლოო გადაწყვეტილება ენდრიუ კოტონის რეკორდსმენად აღიარების შესახებ მიმდინარე წლის მაისში გახდება ცნობილი.


მასალა მომზადებულია „დეილი მეილის“ მიხედვით

10 January 2014

11 ექსტრემალური ამინდის რეკორდი CNN–ისგან

პოპულარული გამოცემა „სი–ენ–ენი“ მსოფლიო მეტეოროლოგიური ორგანიზაციის (WMO) მონაცემებზე დაყრდნობით, 11 ექსტრემალურ მეტეოროლოგიურ რეკორდს აქვეყნებს. აღნიშნულ მონაცემებს ფოტომასალასთან ერთად უცვლელად გთავაზობთ:

ყველაზე დაბალი ტემპერატურა

მსოფლიო მეტეოროლოგიური ორგანიზაციის (WMO) მიხედვით, მსოფლიოში ყველაზე დაბალი ტემპერატურა, – 89.2 გრადუსი ცელსიუსით 1983 წლის 21 ივლისს ვოსტოკზე (ანტარქტიდა) დაფიქსირდა.


ყველაზე მაღალი ტემპერატურა

გასული წლის ივლისში კალიფორნიაში, „სიკვდილის ველზე“ ტემპერატურამ 46.7 გრადუსს მიაღწია, თუმცა, WMO–ს მონაცემებით, ყველაზე ცხელი ტემპერატურა, 56.7 გრადუსი, უახლოეს წარსულში 1913 წელს დაფიქსირდა.


ყველაზე დიდი ნალექი ერთ წუთში

ერთ წუთში მოსული ყველაზე დიდი რაოდენობის ნალექის რეკორდი იუნიონვაილში (მერილენდი, აშშ) დაფიქსირდა – 1956 წლის 4 ივლისს მოსული წვიმის რაოდენობამ 31.2 მილიმეტრს მიაღწია.


ყველაზე დიდი ნალექი 24 საათში

1966 წლის 7–8 იანვარს, ინდოეთის ოკეანის სამხრეთში მდებარე კუნძულ ლა რეიუნიონზე ციკლონი „დენისის“ გადავლის შედეგად წარმოქმნილმა ნალექმა 1 825 მეტრს მიაღწია.


უმძიმესი სეტყვის მარცვალი

მსოფლიოში ყველაზე მძიმე სეტყვის მარცვალი, რომლის წონამ 1.02 კგ შეადგინა, 1986 წლის 14 აპრილს ბანგლადეშში აღმოაჩინეს. მაშინ წარმოქმნილმა შტორმმა გოპალგანჯის დასახლებაში 92 ადამიანი იმსხვერპლა.


ყველაზე გრძელი მშრალი პერიოდი

ისტორიაში ყველაზე მშრალი პერიოდი (14 წელიწადზე მეტი) ჩილეში დაფიქსირდა – 1903 წლის ოქტომბრიდან 1918 წლის იანვრამდე, 173 თვის განმავლობაში არიკას ტერიტორიაზე წვიმის ერთი წვეთიც კი არ ჩამოვარდნილა.


ცივი წყლის უმაღლესი გეიზერი

გერმანიაში არსებული ანდერნახის გეიზერის ჭავლის სიმაღლე 30–დან 60 მეტრამდე მერყეობს. 2002 წლის 19 სექტემბერს კი გეიზერიდან ამოტყორცნილმა ნაკადმა სარეკორდო ნიშნულს – 61.5 მეტრს მიაღწია.


ყველაზე ცივი გზატკეცილი

რუსეთში მდებარე კოლიმას გზატკეცილი (M56) პლანეტის ყველაზე ცივ გზად მიიჩნევა. აქ დაფიქსირებული უმცირესი ტემპერატურა – 67.7 გრადუს ცელსიუსს შეადგენს.

2 031–კილომეტრიანი გზატკეცილის ეს მონაკვეთი „ჩონჩხების გზის“ სახელითაა ცნობილი და გზატკეცილის წარმოშობის ისტორიას უკავშირდება – კოლიმას გზატკეცილის დაგებაში შრომა–გასწორებითი კოლონიის პატიმრებს ამუშავებდნენ, რომელთა უმრავლესობა ადგილზე იღუპებოდა და იქვე იმარხებოდნენ.


უდიდესი (არაპოლარული) ყინულის მოედანი

კანადაში, იუკონის ტერიტორიაზე, კლუეინის ეროვნულ პარკში მსოფლიოს ყველაზე მასშტაბური ყინულის მოედანი მდებარეობს! მისი ფართობი 21 980 კვადრატული კილომეტრია.


უდიდესი უდაბნო

რამდენად გასაკვირიც არ უნდა იყოს, მსოფლიოს უდიდესი უდაბნოს ტიტულს არ ფლობს ცნობილი საჰარა.

სტატიაში მოყვანილი განმარტების მიხედვით, უდაბნო წარმოადგენს ტერიტორიას, სადაც არ მოდის, ან მცირე რაოდენობით მოდის ნალექი. ამ კრიტერიუმით კი პლანეტის უდიდეს უდაბნოდ ანტარქტიკა ითვლება, რომლის ფართობი 14 მილიონი კვადრატული კილომეტრია და იქ წელიწადში მხოლოდ 50 მილიმეტრი ნალექი მოდის.

9.1 კვადრატული მილიონი კვადრატული კილომეტრი ფართობის მქონე საჰარა კი, გინესის მსოფლიო რეკორდების მიხედვით, მხოლოდ ცხელ უდაბნოებს შორის იკავებს უდიდესი უდაბნოს წოდებას.


ყველაზე დაბალი ტემპერატურის მქონე დასახლებული ადგილი

მსოფლიოს ყველაზე ცივი დასახლებული პუნქტი რუსეთში მდებარეობს – ციმბირში, სოფელ ოიმიაკონში 1933 წელს მინუს 68 გრადუს ცელსიუსამდე დაეცა, რაც ანტარქტიკის გარეთ ყველაზე დაბალი ტემპერატურაა.


მასალა მომზადებულია CNN-ის მიხედვით