ჩხოროწყუში ყველაზე დიდი ელარჯი მომზადდება სახელმწიფო დაცვის სპეციალური სამსახურის თანამშრომელმა მეორე რეკორდი დაამყარა სახელმწიფო დაცვის სპეციალური სამსახურის თანამშრომელმა მსოფლიო რეკორდი დაამყარა მხატვარმა ვახტანგ აბაშიძემ მორიგი რეკორდი ზეპირ მათემატიკურ გამოთვლაში დაამყარა იოსებ ხუციშვილმა მორიგი რეკორდი დაამყარა

20 September 2014

ეგვიპტელმა დაივერმა 332 მეტრ სიღრმეზე ჩაყვინთა

ხუთშაბათს, 18 სექტემბერს, ეგვიპტეში სკუბა დაივინგის ახალი მსოფლიო რეკორდი დამყარდა: ყოფილმა სამხედრო მოსამსახურემ – 41 წლის აჰმედ გაბრმა წითელი ზღვის სიღრმეში 332.35 მეტრზე ჩაყვინთა. სარეკორდო სიღრმეზე ჩასვლას გაბრმა 12 წუთი მოანდომა, თუმცა ზედაპირზე უსაფრთხოდ დაბრუნებას დაახლოებით 15 საათი დასჭირდა.

IOL NEWS–ის ცნობით, აჰმედ გაბრი რეკორდის დასამყარებლად 4 წლის განმავლობაში ემზადებოდა. 41 წლის მამაკაცისთვის ეს ჩაყვინთვა სერიოზული რისკის შემცველი იყო, რადგან აღნიშნულ სიღრმეზე წყლის წნევა ერთ კვადრატულ სანტიმეტრზე 35 კილოგრამს აღწევს და ხელს უწყობს ე.წ. „აზოტის ნარკოზისა“ და „მაღალი წნევის ნევროლოგიური სინდრომის“ (HPNS) გამოწვევას. სწორედ ეს უკანასკნელი გახდა ყოფილი რეკორდსმენის, ამერიკელი შეკ ექსლეის სიკვდილის მიზეზი.

რეკორდსმენის ასისტენტების განცხადებით, აჰმედი რამდენიმე თვის განმავლობაში გეგმავდა ყოველ მოძრაობას. ვარჯიშის პერიოდში მას იოგას ოსტატებიც ეხმარებოდნენ, რომლებმაც სუნთქვისა და გულისცემის რიტმის მინიმუმადე დაყვანის ტექნიკა შეასწავლეს. უკიდურეს სიღრმეზე ჩასული მყვინთავისთვის სასიცოცხლო მნიშვნელობა ჰქონდა თვითკონტროლს – ზედაპირზე სწრაფი ამოსვლა მისთვის შესაძლოა ფატალური შედეგით დასრულებულიყო.


გინესის მსოფლიო რეკორდების მსაჯმა ტალალ ომარმა სააგენტო AFP–ს დაუდასტურა, რომ ეგვიპტელი დაივერის შედეგი უკვე დამტკიცებულია და აჰმედ გაბრს შესაბამისი სერტიფიკატიც გადაეცა.

აღსანიშნავია, რომ ამ კატეგორიის რეკორდი ამ დრომდე სადავო იყო: 2005 წელს გავრცელდა ინფორმაცია, რომ ფრანგმა დაივერმა პასკალ ბერნაბემ კორსიკის სანაპიროზე 330 მეტრ სიღრმეზე ჩაყვინთა. ეს მონაცემი მსოფლიოს წამყვანმა კლუბებმა და ექსპერტებმა აღიარეს, თუმცა გინესმა ბერნაბეს მიღწევა უარყო და მსოფლიო რეკორდად სამხრეთ აფრიკელი ნუნო გომესის რეზულტატი – 318.25 მეტრი გამოაცხადა. საბოლოოდ, გუშინდელმა შედეგმა წერტილი დაუსვა გაურკვევლობას, რეკორდსმენის ტიტული კი ეგვიპტელმა აჰმედ გაბრმა დაისაკუთრა.

მასალა მომზადებულია IOL NEWS–ის მიხედვით

16 September 2014

ქართველმა მსჯავრდებულმა ორი ახალი რეკორდი დაამყარა

მსჯავრდებულმა და რეკორდსმენმა კუკური სალბიშვილმა ორი ახალი მსოფლიო რეკორდი დაამყარა. ღონისძიება ქსნის №15 სასჯელაღსრულების დაწესებულებაში გაიმართა, სადაც სალბიშვილი იხდის სასჯელს.

24 წლის სალბიშვილმა პირველი რეკორდი ციხის ეზოში, გულშემატკივრების თანდასწრებით დაამყარა. მან ზედიზედ 42 აზიდვა შეასრულა იოგას ერთ-ერთ პოზაში "ბაკასანა", რომლის დროსაც სხეულის წონასწორობა მხოლოდ ხელებზე დაყრდნობით არის შესაძლებელი. მსგავსი რეკორდი დღემდე არ დამყარებულა.


ამინდის გაუარესების გამო, შემდეგი ასპარეზობა სასჯელაღსრულების დაწესებულების ადმინისტრაციულ კორპუსში გაიმართა. საკუთარი რეკორდის მოსახსნელად მსჯავრდებულს ერთ თითზე 17-ზე მეტი აზიდვა უნდა შეესრულებინა. სალბიშვილი მარჯვენა ხელის შუათითზე ზედიზედ 25-ჯერ აიზიდა და წინა შედეგი 8 ერთეულით გააუმჯობესა.


რეკორდის დამყარების პროცესს საქართველოს რეკორდების ფედერაციის მსაჯები ესწრებოდნენ. მათ ადგილზე დააფიქსირეს კუკური სალბიშვილის შედეგები და მისი მიღწევის დამადასტურებელი სერტიფიკატები გადასცეს.


ჩემი შედეგებით კმაყოფილი ვარ. მინდა, მადლობა გადავუხადო ყველას, ვინც ამ ღონისძიების ორგანიზებაში მიიღო მონაწილობა. აგრეთვე, მადლობას ვუხდი ყველა გულშემატკივარს, ვინც სტიმული მომცა და გამაძლიერა, რომ რეკორდი დამემყარებინა  - განაცხადა სალბიშვილმა.

კუკური სალბიშვილი ერთადერთი ქართველი რეკორდსმენი პატიმარია. წარსულში დამყარებული აქვს ორი მსოფლიო რეკორდი: 2013 წლის 29 მარტს მარჯვენა ხელის შუათითზე ზედიზედ 17 აზიდვა შეასრულა, იმავე წლის 20 სექტემბერს კი ორ თითზე (საჩვენებელ და ცერა თითებზე) ერთი წუთის განმავლობაში 49–ჯერ აიზიდა. ორივე რეკორდი ქსნის № 15 სასჯელაღსრულების დაწესებულებაში, საქართველოს რეკორდების ფედერაციის მსაჯების თანდასწრებით დამყარდა.

ამ თემაზე:

„მსჯავრდებული კუკური სალბიშვილი ორი ახალი რეკორდის დამყარებას შეეცდება“

15 September 2014

მსჯავრდებული კუკური სალბიშვილი ორი ახალი რეკორდის დამყარებას შეეცდება

ქართველი მსჯავრდებული, მსოფლიო რეკორდსმენი კუკური სალბიშვილი ორი ახალი რეკორდის დამყარებას შეეცდება. სარეკორდო ასპარეზობა ხვალ, 16 სექტემბერს, 14:00 საათზე ქსნის № 15 სასჯელაღსრულების დაწესებულებაში ჩატარდება, სადაც სალბიშვილი იხდის სასჯელს. ღონისძიებას საქართველოს რეკორდების ფედერაციის წარმომადგენლები დაესწრებიან.

კუკური სალბიშვილი საკუთარი რეკორდის მოხსნას და კიდევ ერთი, სრულიად ახალი კატეგორიის რეკორდის დამყარებას აპირებს – პირველ ჯერზე იგი შეეცდება, გააუმჯობესოს 2013 წელს დაფიქსირებული მისივე მიღწევა და ერთ თითზე შეუსვენებლად შეასრულოს 17–ზე მეტი აზიდვა. მეორე რეკორდი კი მიზნად ისახავს აზიდვების მაქსიმალური რაოდენობის შესრულებას იოგას ერთ–ერთ პოზაში – „ბაკასანა“, რომლის დროსაც ფეხები მოთავსებულია მხრებზე, სხეული კი მხოლოდ ხელებს ეყრდნობა. აღსანიშნავია, რომ ასეთი სახის რეკორდი დღემდე არ დამყარებულა.

24 წლის კუკური სალბიშვილი ერთადერთი ქართველი რეკორდსმენი პატიმარია. დამყარებული აქვს ორი მსოფლიო რეკორდი: 2013 წლის 29 მარტს მარჯვენა ხელის შუათითზე ზედიზედ 17 აზიდვა შეასრულა, იმავე წლის 20 სექტემბერს კი ორ თითზე (საჩვენებელ და ცერა თითებზე) ერთი წუთის განმავლობაში 49–ჯერ აიზიდა. ორივე რეკორდი ქსნის № 15 სასჯელაღსრულების დაწესებულებაში, საქართველოს რეკორდების ფედერაციის მსაჯების თანდასწრებით დამყარდა.

იხილეთ კუკური სალბიშვილის რეკორდების ვიდეომასალები: